Гъуашъо Руслан исуд шышъхьэIум и 2-м лъагъэкIотагъ


Бэдзэогъум и 19-м, Хы Iушъо Шапсыгъэм щыщ Адыгэ активистэу Гъуашъо Русльан исуд Краснодар краий судым щыкIуагъ. 

Гъуашъо Руслан судым къэкIон ылъэкIыгъэп. Ар смэджэщым тыгъуасэ чIэгъолъыхьагъ. Полицием илIык1охэу Руслан къедэуагъэхэр судым къэкIуагъэхэп, ащ пае судым итхьэматэ судыр лъигъэкIотагъ шышъхьэIум и 2-м (02.08.2017).

Краснодар cудым, Адыгэ Республикэм, Краснодар краим ыкIи Шапсыгъэ хы Iушъом ащыщ Адыгэ активистхэр къекIолIагъэх. Гъуашъом иадвукати Марина Дубровино судым щыIагъ.

Шъугу къэтэгъэкIыжьы, мэкъуогъум и 2-м, Хы Iушъом Iут къалэу Лазаровск (ПсышIуапIэ) дэт судым Гъуашъо Руслан мин 10 рубл къытрилъхьагъ, цIыфхэр уфимытэу зэхэпщагъэх иIуи. 
Iофэу Адыгэ активистыр зэрагъэмысэрэр: жъоныгъуакIэм и 21-м, шъыгъо-шIэжь мафэм, нэбгрэ 50 фэдэиз хъухэу, хы Iушъом щыщ Адыгэхэм, къалэу Головинка (ЩахэкIэй) дэт чъыг иным идэжь тхьэлъIу щашIыгъ. Ар зэрищэгъагъэр Гъуашъор ары. Ащ пае, ар суд ашIыгъ. Джащ фэдэу Хы Iушъом щыщ Адыгэ кIалэу Бастэ Адам, Гъуашъом уригъусагъ аIуи, суд ашIыгъ ыкIи мин 10 рубл тыралъхьагъ.

Мы Iофым фэгъэхьыгъэу, Краснодар край къулыкъухэр ыкIи Краснодар край судыр Адыгэ активистхэм мызафэу къызэрадэзекIохэрэм дырамыгъащтэу, Адыгэ республикэм, Къэбэртае-Бэлкъарым, Къэрэщай-Черкесым ыкIи Хы Iушъо Шапсыгъэм ащыщ Адыгэ активистхэм джэпсалъэхэр къашIыгъэх.








Comments